Þetta er þjálfarinn sem talar

Þetta finnst mér flott hjá þjálfaranum,vonandi verðu hann ekki illur þó ég birti þetta hér mér finnst þetta FLOTT.

Að gera það sem engum hefur áður tekist

Hjálpaðu okkur að láta drauminn rætast

19.6.2008

Kæri stuðningsmaður,

Þann 6. janúar 2007 sat ég fund með 40 bestu leikmönnum Íslands.  Á þeim fundi ákváðum við að gera það sem engum hefur áður tekist í sögu íslenskrar knattspyrnu.  Við ákváðum að verða fyrsta A-landslið Íslands sem kemst í úrslitakeppni stórmóts.  Til að ná að gera það sem engum hefur áður tekist þarf ákveðið hugarfar og það hefur verið eitt aðal áhersluatriðið mitt í vinnu minni með þennan hóp.  A-landslið kvenna væri nú í 3. sæti á heimslista FIFA ef listinn hefði verið núllstilltur þegar við byrjuðum að vinna saman.  Það sýnir vel hugarfar liðsins að liðið stefnir ennþá hærra á listanum.

Að þjálfa liðið er eitt það skemmtilegasta sem ég hef gert í lífinu.  Stuðningsteymið í kringum liðið er líka einstakt.  Í upphafi var ekki búist við miklu, enda þjálfarinn "reynslulaus", aðstoðarþjálfarinn "100 ára gamall" og lykilmenn hafa bæði hætt og meiðst.  En stelpurnar okkar hafa unnið glæsta sigra og þjóðin hefur hrifist með. 

Á síðasta heimaleik komu 6.000 stuðningsmenn að styðja við bakið á okkur á ógleymanlegan hátt.  Áhorfendametið var tvöfaldað á þeim leik.  Það var stórkostlegt  að upplifa þá baráttu, leikgleði, samheldni og  þjóðarstolt sem skein þá af liðinu.  Katrín Jónsdóttir fyrirliði landsliðsins sagði þá inni í klefa í hálfleik:  "Mér finnst við vera tveimur fleiri á vellinum því það er svo frábær stuðningur frá fólkinu."  Það mun hjálpa okkur mikið ef við leikum aftur "13 á móti 11" og þar kemur þú inn! 

Það eru 9.800 sæti á Laugardalsvelli.  Ég sagði við stelpurnar fyrir mörgum mánuðum síðan að það yrði uppselt á kvennalandsleik á þessu ári og þær ráku upp stór augu.  Ég stend við það sem ég sagði.  "Stelpurnar okkar" eiga skilið að það sé stuðningsmaður í hverju einasta sæti á heimaleikjum liðsins.  Væri ekki magnað ef það væri "uppselt" á leik kvennalandsliðsins og okkur tækist að gera það sem engum hefur áður tekist - með þinni hjálp.      

Hjálpaðu okkur að láta drauminn rætast. 

Áfram Ísland!

Siggi Raggi      

A-landsliðsþjálfari kvenna

"Það er alltaf rosalega gaman á vellinum hjá okkur"

23.6.2008

Kæru Íslendingar,

Nú er landsleikurinn búinn gegn Slóveníu þar sem vannst mikilvægur 5-0 sigur í riðlakeppni Evrópumótsins.  Það komu 3.922 áhorfendur að styðja við bakið á okkur og það var frábær stemmning á leiknum.  Leikurinn var sá næstfjölmennasti í sögu íslenska kvennalandsliðins.  Tólfan mætti í fyrsta skipti á leik hjá okkur og bjó til frábæra stemmningu.  Þessir 3.922 manns eiga þakkir skilið. 

Ég hugsa að flestir landsmenn séu meðvitaðir um að kvennalandsliðinu gengur mjög vel og eru stoltir af árangri liðsins.  Einhverra hluta vegna eru þeir samt ekki allir tilbúnir að koma á völlinn og sína þar með stuðning sinn í verki.  En það er þeirra missir, því það er alltaf rosalega gaman á vellinum hjá okkur!  Við ætlum líka að hafa gaman á fimmtudaginn. 

Á fimmtudaginn mun kvennalandsliðið vonandi leika sinn síðasta heimaleik á þessu ári og að þessu sinni gegn Grikklandi.  Sigur í þeim leik myndi gera það að verkum að okkur myndi duga jafntefli í síðasta leik okkar gegn Frakklandi til að vinna riðilinn okkar og þar með ná því markmiði að verða fyrsta A-landslið Íslands sem kemst í úrslitakeppni stórmóts.

Úrslit leiksins skipta líka öllu máli fyrir okkur upp á hversu sterkan mótherja við myndum fá í umspili í haust ef við myndum lenda í því að enda í 2. sætinu í okkar riðli og fara því umspilsleiðina.

Sigur gegn Grikklandi mun sennilega tryggja okkur það að mæta liði í umspili sem lenti í 3. sæti í sínum riðli.  Landsleikurinn á fimmtudaginn er því ekki síður mikilvægari en síðasti landsleikur.  Við treystum áfram á stuðning þinn og íslensku þjóðarinnar! 

Á fimmtudaginn er síðasti séns að sína kvennalandsliðinu þann stuðning sem þær eiga skilið.  Ég treysti á að þú mætir og takir alla sem þú þekkir með þér!

Sjáumst á vellinum!

Áfram Ísland

Siggi Raggi

A-landsliðsþjálfari kvenna

ÁFRAM ÍSLANDS Konur

Til baka Senda grein Prenta greinina

Dóra í byrjunarliðinu gegn Grikkjum